ຄະນະນຳໂຮງໝໍຮ່າໂນ້ຍ - ວຽງຈັນ ເດີນທາງຢ້ຽມຢາມ ແລະ ເຮັດວຽກກັບ 2 ສະຖາບັນມະຫາວິທະຍາໄລຊັ້ນນຳດ້ານການແພດຂອງຫວຽດນາມ

ໃນວັນທີ 16-17 ພະຈິກ 2026 ທີ່ຜ່ານມາ, ຄະນະຜູ້ບໍລິຫານໂຮງໝໍຮ່າໂນ້ຍ - ວຽງຈັນ ນຳໂດຍ ທ່ານ ດຣ. ດາວວຽງ ດວງຈະເລີນ ພ້ອມດ້ວຍຄະນະ ໄດ້ເດີນທາງໄປຢ້ຽມຢາມ ແລະ ເຮັດວຽກກັບ 2 ສະຖາບັນການສຶກສາດ້ານການແພດຊັ້ນນຳຂອງສາທາລະນະລັດສັງຄົມນິຍົມຫວຽດນາມ ຄື:
ໃນວັນທີ 16 ພະຈິກ 2026: ຄະນະໄດ້ເຂົ້າຢ້ຽມຢາມ ແລະ ເຮັດວຽກກັບມະຫາວິທະຍາໄລພະຍາບານນາມດິ້ງ (Nam Dinh University of Nursing). ການພົບປະໃນຄັ້ງນີ້ ແມ່ນມີຈຸດປະສົງເພື່ອສົ່ງເສີມສາຍພົວພັນການຮ່ວມມືດ້ານວິຊາການ, ການແລກປ່ຽນປະສົບການໃນວຽກງານການພະຍາບານ, ການຝຶກອົບຮົມ ແລະ ການພັດທະນາບຸກຄະລາກອນທາງການແພດ ເພື່ອສ້າງແຫຼ່ງບຸກຄະລາກອນທີ່ມີຄວາມຮູ້, ຄວາມສາມາດ ແລະ ທັກສະວິຊາຊີບ ຕອບສະໜອງຕໍ່ຄວາມຕ້ອງການຂອງໂຮງໝໍໃນປັດຈຸບັນ ແລະ ໃນອະນາຄົດ.









ໃນວັນທີ 17 ພະຈິກ 2026: ຄະນະໄດ້ເດີນທາງຕໍ່ໄປຢ້ຽມຢາມ ແລະ ເຮັດວຽກກັບມະຫາວິທະຍາໄລການແພດທ໋າຍບິ່ງ (Thai Binh University of Medicine and Pharmacy) ເພື່ອແລກປ່ຽນທັດສະນະ, ປຶກສາຫາລືກ່ຽວກັບແນວທາງ ແລະ ໂອກາດໃນການຮ່ວມມືດ້ານການສຶກສາ, ການຝຶກອົບຮົມ, ການພັດທະນາທັກສະວິຊາຊີບ ແລະ ການສ້າງບຸກຄະລາກອນດ້ານສາທາລະນະສຸກ
ການຢ້ຽມຢາມ ແລະ ເຮັດວຽກກັບທັງ 2 ສະຖາບັນໃນຄັ້ງນີ້ ຖືເປັນອີກບາດກ້າວສຳຄັນຂອງໂຮງໝໍຮ່າໂນ້ຍ - ວຽງຈັນ ໃນການຂະຫຍາຍເຄືອຂ່າຍຄວາມຮ່ວມມືກັບສະຖາບັນການສຶກສາທັງພາຍໃນ ແລະ ຕ່າງປະເທດ. ໂດຍມຸ່ງເນັ້ນການຍົກສູງຂີດຄວາມສາມາດໃນການຜະລິດ ແລະ ພັດທະນາບຸກຄະລາກອນທາງການແພດ, ສົ່ງເສີມໂອກາດໃຫ້ນັກຮຽນ ແລະ ນັກສຶກສາທີ່ມີໃຈຮັກ ແລະ ມີຄວາມມຸ່ງໝັ້ນໃນວິຊາຊີບການແພດ ໄດ້ມີໂອກາດສຶກສາ, ຝຶກຝົນ ແລະ ພັດທະນາຕົນເອງ ກ້າວສູ່ການເປັນບຸກຄະລາກອນທີ່ມີຄຸນນະພາບ.
ນອກຈາກນີ້, ການຮ່ວມມືດັ່ງກ່າວຍັງເປັນໂອກາດໃນການແລກປ່ຽນອົງຄວາມຮູ້, ປະສົບການ ແລະ ເຕັກນິກທາງການແພດ, ພ້ອມທັງສົ່ງເສີມການຮ່ວມມືໃນການຝຶກອົບຮົມ ແລະ ພັດທະນາບຸກຄະລາກອນຢ່າງຕໍ່ເນື່ອງ. ທັງໝົດນີ້ມີເປົ້າໝາຍເພື່ອຍົກລະດັບມາດຕະຖານວິຊາການ, ປັບປຸງຄຸນນະພາບການບໍລິການກວດຮັກສາ ແລະ ດູແລສຸຂະພາບປະຊາຊົນໃຫ້ນັບມື້ນັບດີຂຶ້ນ ພ້ອມທັງປະກອບສ່ວນເສີມສ້າງຄວາມເຂັ້ມແຂງໃຫ້ແກ່ຂະແໜງການສາທາລະນະສຸກຂອງທັງສອງປະເທດ.
ໃນໂອກາດນີ້, ຄະນະນຳໂຮງໝໍຮ່າໂນ້ຍ - ວຽງຈັນ ຂໍສະແດງຄວາມຂອບໃຈຢ່າງສຸດຊຶ້ງມາຍັງຄະນະຜູ້ບໍລິຫານ ແລະ ຄະນະວິຊາການຂອງມະຫາວິທະຍາໄລພະຍາບານນາມດິ້ງ ແລະ ມະຫາວິທະຍາໄລການແພດທ໋າຍບິ່ງ ທີ່ໄດ້ໃຫ້ການຕ້ອນຮັບຢ່າງອົບອຸ່ນ, ໃຫ້ກຽດ ແລະ ອຳນວຍຄວາມສະດວກໃນການຢ້ຽມຢາມ ແລະ ເຮັດວຽກໃນຄັ້ງນີ້. ພວກເຮົາຫວັງເປັນຢ່າງຍິ່ງວ່າ ສາຍພົວພັນອັນດີງາມໃນຄັ້ງນີ້ ຈະເປັນຈຸດເລີ່ມຕົ້ນໃຫ້ແກ່ການຮ່ວມມືຢ່າງເປັນຮູບປະທຳ, ມີປະສິດທິຜົນ ແລະ ຍືນຍົງໃນອະນາຄົດ ເພື່ອຮ່ວມກັນພັດທະນາວຽກງານການສຶກສາ, ການແພດ ແລະ ສາທາລະນະສຸກໃຫ້ກ້າວໜ້າຍິ່ງຂຶ້ນ.
Other news

Đội phản ứng nhanh về đột quỵ
Đó là đội phản ứng nhanh về đột quỵ được Bệnh viện Đà Nẵng thành lập 3 năm nay. Khoảng 7g20 một buổi sáng cuối tháng 7, khoa cấp cứu Bệnh viện Đà Nẵng...

Cách phòng ngừa bệnh trĩ hiệu quả
Có rất nhiều người mắc bệnh trĩ và phần lớn đều coi nhẹ bệnh này cho đến khi bệnh phát triển đến giai đoạn muộn khi trĩ phình to, thòi ra ngoài hậu...

GIỚI THIỆU VỀ DỊCH VỤ KHÁM SỨC KHỎE ĐỊNH KỲ CHO CÁ NHÂN, CƠ QUAN,...
Khám sức khỏe định kỳ là một hoạt động thường niên mang ý nghĩa chăm sóc và nâng cao chất lượng cuộc sống và sức khỏe cho người dân . Qua đó, giúp mỗi...

